Виктор Губарев: «Айар үлэһиттэр биэнсийэҕэ эрдэ тахсыахтаахтар»

Бэҕэһээ, сэтинньи 30 күнүгэр СӨ култууратын үлэһиттэрин идэлээх сойуустара тэриллибитэ 70 сылыгар анаммыт тэрээһин буолан ааста.  Идэлээх сойууска 2022 с. ааҕан көрбүттэринэн, 9057 киһи киирэр, үлэлиир дьонтон 78% профсойууһунан хабыллар. Бу Уһук Илин саамай элбэх ахсааннаах түмсүү, оттон Арассыыйа үрдүнэн  7 миэстэҕэ турар.

Ол туһунан СӨ култууратын үлэһиттэрин идэлээх сойуустарын бэрэссэдээтэлэ, СӨ култууратын үтүөлээх үлэһитэ Анастасия Самсонова иһитиннэрдэ. Кини идэлээх сойуус үлэтин-хамнаһын, ситиһиитин туһунан билиһиннэрдэ.

Уопсастыбаннай түмсүү култуура, библиотека, архыып, типография, көрдөрөр-иһитиннэрэр ситим үлэһиттэрин интэриэһин көмүскүүр, кинилэр бассейнҥа сылдьарга, доруобуйаны чэбдигирдэргэ чэпчэтиинэн туһаналлар. Санаторийга эмтэнэллэригэр, омук сиригэр сынньаналларыгар путевка сороҕун  төлүүллэр, ити сыалга сылга 4 мөл. үп көрүллэр.

Ону таһынан, элбэх оҕолоох ыал оҕолоро оскуолаҕа баралларыгар, доруобуйаларынан хааччахтаах дьоҥҥо араас көмө оҥоһуллар. Саха Сиригэр аутсорсинг киирэр кэмигэр 700 киһи үлэтиттэн сарбыйыллыахтааҕын идэлээх сойуус туруулаһан, ону тохтоппут. Туох даҕаны олоҕо суох 80 киһини үлэлэриттэн уураппыттарын, тэрилтэ салайааччытын кытта кэпсэтэн, үлэлэригэр төнүннэрбиттэр. Оттон 20 ууратыллыбыт киһи интэриэһин суут нөҥүө көмүскээбиттэр.

Сороҕор салалта да өттүттэн өйдөммөт түгэн, үлэ сокуонун кэһии, өрөбүлгэ күһэйэн туран төлөбүрэ суох үлэлэтии тахсар, онон идэлээх сойуус үлэһит киһи быраабын харыстыыр уонна көмүскүүр сыаллаах-соруктаах.

Үлэ сокуонугар ыйылларынан, киһи үлэ чааһын таһынан үлэлиир кэмэ хайаан да төлөнүөхтээх. Өскөтүн, тэрилтэҕэ уустук балаһыанньа бүрүүкээн, үп-харчы кырыымчык түгэнигэр, эбии сынньалаҥ күн бэриллиэхтээх.

Үлэһиттэр хамнастан биир бырыһыанын профсойууска төлүүллэр, сорох тэрилтэлэр ол хомуйбут харчыларынан Саҥа Дьыллааҕы корпоратив тэрийэн ыыталлар, дьиҥэр, бу үп идэлээх сойуус чилиэнэ кыһалҕалаах кэмигэр күүс-көмө буолуохтаах. Корпоративнай тэрээһиннэри тэрилтэ бэйэтэ үбүлээн оҥоруохтаах.

Кэлэктиип дуогабарыгар идэлээх сойуус уонна тэрилтэ аатыттан, холобур, үлэһит уруу тэринэр дьоро киэһэтигэр, оҕо төрөөтөҕүнэ, чугас дьоҥҥун сүтэрэр кэмҥэр, үбүлүөйгэ, корпоративнай тэрээһиннэргэ төһө харчы көрүллэрэ ыйылла сылдьыахтаах.

Идэлээх сойуус туруорсарынан, инфляция үрдээтэ да, хамнас ону ситэн иһиэхтээх. Биллэрин курдук, билигин ас-таҥас, туттар тэрил сыаната 40-50% үрдээтэ, ону хамнас кыайан сиппэт.

Ил Түмэн култуураҕа уонна маассабай информация сириэстибэлэригэр сис кэмитиэт бэрэссэдээтэлэ Виктор Губарев култуура үлэһиттэрин идэлээх сойуустарын үбүлүөйүнэн эҕэрдэлээтэ. Кини дойду бэрисидьиэнэ Владимир Путин нация куттала суох буоларын хааччыйарга култуура инники кирбиигэ сылдьарын туһунан эппитин санатта.

«Маннык уустук кэмҥэ Саха Сиригэр биир даҕаны үөрэх кыһата, кулууп, хаһыат сабыллыбытаҕа хайҕаллаах. Өрөспүүбүлүкэ кэлэр сыллааҕы бүддьүөтүн ылынарга култуура салаатыгар биир даҕаны пууну көҕүрэппэтибит, ону ааһан, сороҕун элбэттибит. Хамнас үрдээһинин, улуус хаһыаттарын өйөөтүбүт. Ону таһынан, айар үлэһиттэр биэнсийэҕэ эрдэ тахсалларын хааччыйарга өссө дьаныардаахтык үлэлиэхтээхпит», — диэн эттэ Виктор Губарев. Кини култуура бастыҥ үлэһиттэригэр Бочуоттаах грамоталары туттартаата.

Ил Түмэн бэрэссэдээтэлин солбуйааччы, байыаннай сулууспалаахтар, байыаннай дьайыы бэтэрээннэрин, патриотическай иитиигэ уонна уопсастыбаннай түмсүүлэр боппуруостарыгар сис кэмитиэт бэрэссэдээтэлэ Александр Подголов ис сүрэхтэн эҕэрдэлээн туран, култуура бастыҥ үлэһиттэрин Бочуоттаах грамотанан наҕараадалаата.

Сиһилии «Ил Түмэн» хаһыат кэлэр нүөмэригэр ааҕыҥ.